Agus a dtionscadal á fhorbairt agus roimh chur isteach ar mhaoiniú ón Aontas, ní mór d’iarratasóirí a fhíorú go n‑urramaíonn siad agus a dtionscadal na critéir seo a leanas: inghlacthacht, incháilitheacht, eisiamh, roghnú agus dámhachtain.

Critéir incháilitheachta

Ní mór iarratais a sheoladh tráth nach déanaí ná an sprioc‑am chun iarratais a chur isteach mar a léirítear sa ghlao. 

Ní mór do na hiarratais a bheith inléite agus inrochtana.

Ní mór iarratais a bheith líonta isteach ina n‑iomláine agus na codanna agus na hiarscríbhinní sainordaitheacha uile iontu. Ní féidir ach amháin earráidí cléireachais a cheartú tar éis an sprioc‑ama chun iarratas a chur isteach arna iarraidh sin don ghníomhaireacht bainistíochta le haghaidh cásanna a bhfuil údar cuí leo.

I gcás gníomhaíochtaí atá á mbainistiú ag an nGníomhaireacht Feidhmiúcháin, ní mór iarratais a chur isteach go leictreonach trí Thairseach an Aontais um Dheiseanna Cistiúcháin agus Tairisceana. Ní mór iarratais (lena n‑áirítear iarscríbhinní agus doiciméid tacaíochta) a chur isteach agus úsáid á baint as na foirmeacha a sholáthraítear sa Chóras Aighneachta Tairiscintí.

Ní mór do thograí an t‑eolas a iarrtar chomh maith leis na hiarscríbhinní riachtanacha agus na doiciméid tacaíochta go léir a chomhlíonadh agus a chuimsiú:

• Foirm Iarratais Cuid A — ina bhfuil eolas riaracháin faoi na rannpháirtithe (comhordaitheoir, tairbhithe agus eintitis chleamhnaithe amach anseo) agus buiséad coimrithe an tionscadail (le líonadh isteach go díreach ar líne);
• Foirm Iarratais Cuid B — ina bhfuil tuairisc theicniúil ar an tionscadal (le híoslódáil ón gCóras Ríomhaighneachta Tairsí, le líonadh isteach agus, ina dhiaidh sin, le cóimeáil agus le hath‑uaslódáil); agus
• Cuid C (le líonadh isteach go díreach ar líne, más ann) ina bhfuil sonraí tionscadail breise

Tá iarratais (Cuid B) teoranta do 40 leathanach le haghaidh glaonna ar dheontais ar luach íseal (EUR 60 000 nó faoina bhun), 120 leathanach le haghaidh glaonna lena ngabhann deontais ardluacha (EUR 4 000 000), agus 70 le haghaidh na nglaonna uile eile. Tá na gníomhaíochtaí seo a leanas ina n‑eisceacht ar an riail sin:  40 leathanach le haghaidh ‘Fothú Acmhainneachta san Ardoideachas’ agus 70 leathanach le haghaidh ghníomhaíocht Chomhchéim Mháistreachta Erasmus Mundus. Ní chuirfidh meastóirí aon leathanach breise san áireamh.

I gcás gníomhaíochtaí atá á mbainistiú ag Gníomhaireachtaí Náisiúnta Erasmus+, ní mór iarratais a chur isteach go leictreonach trí na foirmeacha atá le fáil ar shuíomh gréasáin Erasmus+ agus ar shuíomh gréasáin an Chóir Dlúthpháirtíochta Eorpaigh. 

Critéir incháilitheachta

Úsáidtear na critéir incháilitheachta chun a chinneadh cibé acu a cheadaítear nó nach gceadaítear don iarratasóir páirt a ghlacadh i nglao ar thograí agus togra le haghaidh gníomhaíochta a chur isteach. Tá feidhm acu maidir leis na hiarratasóirí agus maidir leis na tionscadail/gníomhaíochtaí ar lena n‑aghaidh a iarrtar an deontas (próifíl, an líon eagraíochtaí rannpháirteacha atá i gceist, an cineál tionscadail nó/agus gníomhaíochtaí, fad na ngníomhaíochtaí, próifíl agus/nó líon na rannpháirtithe atá i gceist mar shampla).

Le bheith incháilithe, ní mór don iarratasóir agus don tionscadal cloí leis na critéir incháilitheachta uile a bhaineann leis an nGníomhaíocht faoina bhfuil an togra á chur isteach. Mura gcomhlíonann an togra na critéir incháilitheachta ag céim an iarratais, diúltófar dó gan meastóireacht bhreise a dhéanamh air. Má dhealraíonn sé ag céim an chur chun feidhme nó ag céim na tuarascála críochnaithí nár comhlíonadh na critéir sin, is féidir a mheas go bhfuil na gníomhaíochtaí neamh‑incháilithe agus féadfar an deontas ón Aontas a dámhadh don tionscadal i dtosach a ghnóthú mar thoradh air sin.

Tá tuairisc i gCuid B den Treoir ar na critéir incháilitheachta a bhfuil feidhm acu maidir le gach ceann de na Gníomhaíochtaí a chuirtear chun feidhme leis an Treoir ar Chlár Erasmus+.

Critéir eisiaimh

I gcomhréir le hAirteagal 137(2) den Rialachán Airgeadais, faoi bhainistíocht dhíreach agus indíreach, beidh feidhm ag an gcóras luathbhraite agus luatheisiaimh maidir leis an méid seo a leanas:

• rannpháirtithe agus faighteoirí;
• eintitis a bhfuil sé ar intinn ag an iarrthóir nó an tairgeoir brath ar a gcumas nó fochonraitheoirí conraitheora;
• aon duine nó eintiteas a fhaigheann cistí de chuid an Aontais i gcás ina gcuirfear an buiséad chun feidhme de bhun phointe (c) den chéad fhomhír d’Airteagal 62(1) agus Airteagal 157(4) ar bhonn eolais faoinar tugadh fógra i gcomhréir le hAirteagal 158(7);
• ráthóirí;
• urraitheoirí amhail dá dtagraítear in Airteagal 26;
• úinéirí tairbhiúla agus aon chleamhnaí de chuid an eintitis eisiata dá dtagraítear in Airteagal 138(6);
• daoine nádúrtha dá dtagraítear in Airteagal 138(5), an chéad fhomhír, pointí (a) go (c).

Tá an méid sin gan dochar d’Airteagal 157(7) agus do na rialacha a leagtar síos i gcomhaontuithe ranníocaíochta, i gcás daoine nó eintiteas a fhaigheann cistí ón Aontas i gcás ina gcuirtear an buiséad chun feidhme de bhun Airteagal 62(1), an chéad fhomhír, pointe (c).

I gcomhréir le hAirteagal 138 den Rialachán Airgeadais, déanfaidh an t‑oifigeach údarúcháin atá freagrach duine nó eintiteas dá dtagraítear thuas a eisiamh ó pháirt a ghlacadh i nósanna imeachta dámhachtana faoi Chlár Erasmus+, nó cistí de chuid an Aontais a chur chun feidhme má tá an duine nó an t‑eintiteas sin i gceann de na cásanna eisiaimh seo a leanas:

1. tá an duine nó an t‑eintiteas ina fhéimheach, faoi réir nósanna imeachta dócmhainneachta nó imeachtaí foirceanta, tá a shócmhainní á riaradh ag leachtaitheoir nó ag cúirt, tá sé i gcomhshocraíocht le creidiúnaithe, tá a ghníomhaíochtaí gnó curtha ar fionraí, nó tá sé in aon chás analógach a eascraíonn as nós imeachta den chineál céanna dá bhforáiltear faoi dhlí an Aontais nó faoin dlí náisiúnta;
2. suíodh le breithiúnas críochnaitheach nó le cinneadh riaracháin críochnaitheach go raibh an duine nó an t‑eintiteas ag sárú a chuid oibleagáidí i ndáil le cánacha a íoc nó ranníocaíochtaí slándála sóisialta a dhéanamh i gcomhréir leis an dlí is infheidhme;
3. suíodh le breithiúnas críochnaitheach nó le cinneadh riaracháin críochnaitheach go raibh an t‑iarratasóir ciontach i mí‑iompar gairmiúil tromchúiseach trí dhlíthe nó rialacháin nó caighdeáin eiticiúla infheidhme na gairme lena mbaineann an t‑iarratasóir a shárú, nó go raibh sé i mbun aon iompair éagóraigh a bhfuil tionchar aige ar a inchreidteacht ghairmiúil i gcás ina léirítear leis an iompar sin intinn éagórach nó mórfhaillí, lena n‑áirítear, go háirithe, aon cheann de na nithe seo a leanas:
   1. tugadh bréagléiriú go calaoiseach nó go faillíoch ar fhaisnéis a theastaíonn chun a fhíorú nach bhfuil foras eisiaimh ann nó chun na critéir roghnúcháin nó incháilitheachta a chomhlíonadh nó i bhfeidhmiú an ghealltanais dhlíthiúil;
   2. chuaigh sé i mbun comhaontú le daoine nó eintitis eile chun iomaíocht a shaobhadh;
   3. sháraigh sé cearta maoine intleachtúla;
   4. tionchar míchuí nó iarracht tionchar míchuí a imirt ar an bpróiseas cinnteoireachta chun cistí de chuid an Aontais a fháil trí leas a bhaint, trí mhífhaisnéis, as coinbhleacht leasa lena mbaineann aon ghníomhaithe airgeadais nó daoine eile, dá dtagraítear in Airteagal 61(1) den Rialachán Airgeadais;
   5. rinne sé iarracht teacht ar eolas rúnda a d’fhéadfadh buntáistí míchuí a thabhairt dó sa phróiseas dámhachtana;
   6. gríosú chun idirdhealaithe, fuatha nó foréigin i gcoinne grúpa daoine nó ball de ghrúpa nó a leithéid gníomhaíochtaí atá contrártha do na luachanna ar a bhfuil an tAontas fothaithe, mar a chumhdaítear in Airteagal 2 CAE, i gcás ina bhfuil tionchar ag mí-iompar ar shláine an duine nó an eintitis a imríonn tionchar diúltach nó a bhfuil baol nithiúil ann go n‑imreoidh sé tionchar ar chur chun feidhme an ghealltanais dhlíthiúil;
4. suíodh le breithiúnas críochnaitheach go bhfuil an t‑iarratasóir ciontach in aon cheann díobh seo a leanas:
   1. calaois, de réir bhrí Airteagal 3 de Threoir (AE) 2017/1371 ó Pharlaimint na hEorpa agus ón gComhairle¹ agus Airteagal 1 den Choinbhinsiún maidir le cosaint leasanna airgeadais na gComhphobal Eorpach, a tarraingíodh suas le Gníomh an 26 Iúil 1995 ón gComhairle² ;
   2. éilliú, mar a shainmhínítear in Airteagal 4(2) de Threoir (AE) 2017/1371 nó éilliú gníomhach de réir bhrí Airteagal 3 den Choinbhinsiún maidir leis an gcomhrac i gcoinne an éillithe a bhfuil oifigigh na gComhphobal Eorpach nó oifigigh Bhallstáit an Aontais Eorpaigh páirteach ann, a tarraingíodh suas le Gníomh an 26 Bealtaine 1997³ ón gComhairle, nó iompar dá dtagraítear in Airteagal 2(1) de Chinneadh Réime 2003/568/CGB ón gComhairle⁴ , nó éilliú mar a shainmhínítear i ndlíthe infheidhme eile;
   3. iompar a bhaineann le heagraíocht choiriúil dá dtagraítear in Airteagal 2 de Chinneadh Réime 2008/841/CGB ón gComhairle⁵ ;
   4. sciúradh airgid nó maoiniú na sceimhlitheoireachta, de réir bhrí Airteagal 1(3), (4) agus (5) de Threoir (AE) 2015/849 ó Pharlaimint na hEorpa agus ón gComhairle⁶ ;
   5. cionta sceimhlitheoireachta nó cionta a bhaineann le gníomhaíochtaí sceimhlitheoireachta, mar a shainmhínítear iad in Airteagal 3 agus Airteagal 12 de Chinneadh (AE) 2017/541 ó Pharlaimint na hEorpa agus ón gComhairle⁷ , nó na cionta sin a spreagadh, cuidiú leo, iad a neartú nó ag féachaint leis na cionta sin a dhéanamh, dá dtagraítear in Airteagal 14 den Chinneadh sin;
   6. saothar leanaí nó cionta eile a bhaineann le gáinneáil ar dhaoine dá dtagraítearin Airteagal 2 de Threoir 2011/36/AE ó Pharlaimint na hEorpa agus ón gComhairle⁸ ;
5. gur léirigh an duine nó an t‑eintiteas easnaimh shuntasacha maidir leis na príomhoibleagáidí a chomhlíonadh atá ag baint le gealltanas dlíthiúil a chomhlíonadh arna mhaoiniú ag buiséad an Aontais agus gur eascair ceann de na torthaí seo a leanas as:
   1. foirceannadh an gealltanas dlíthiúil go luath;
   2. d’eascair cur i bhfeidhm damáistí leachtaithe nó pionóis chonarthacha eile as; nó;
   3. d’aimsigh oifigeach údarúcháin, OLAF, Oifig an Ionchúisitheora Phoiblí Eorpaigh (OIPE) nó an Chúirt Iniúchóirí iad tar éis seiceálacha, iniúchtaí nó imscrúduithe a dhéanamh;
6. suíodh le breithiúnas críochnaitheach nó le cinneadh riaracháin críochnaitheach go ndearna an duine nó an t‑eintiteas neamhrialtacht de réir bhrí Airteagal 1(2) de Rialachán (CE, Euratom) Uimh. 2988/95 ón gComhairle⁹ ;
7. suíodh le breithiúnas críochnaitheach nó le cinneadh riaracháin críochnaitheach gur chruthaigh an duine nó an t‑eintiteas eintiteas i ndlínse eile agus é mar aidhm aige dul timpeall ar oibleagáidí fioscacha, sóisialta nó oibleagáidí dlíthiúla eile i ndlínse a oifige cláraithe, a riaracháin lárnaigh nó a phríomháite gnó;
8. suíodh le breithiúnas críochnaitheach nó cinneadh riaracháin críochnaitheach gur cruthaíodh eintiteas leis an intinn dá dtagraítear i bpointe (g);
9. chuir an t‑eintiteas nó an duine in aghaidh imscrúdaithe, seiceála nó iniúchta arna dhéanamh ag oifigeach údarúcháin nó ag a ionadaí nó ag a iniúchóir, ag OLAF, ag OIPE nó ag an gCúirt Iniúchóirí, d’aon ghnó agus gan údar cuí. Measfar go bhfuil curtha in aghaidh imscrúdaithe, seiceála nó iniúchta ag an duine nó ag an eintiteas i gcás ina ndéanann sé nó sí gníomhaíochtaí agus é mar chuspóir nó mar éifeacht dá thoradh sin cosc, bac nó moill a chur ar chur i gcrích aon cheann de na gníomhaíochtaí is gá chun an t‑imscrúdú, an tseiceáil nó an t‑iniúchadh a dhéanamh. Áireofar le gníomhaíochtaí den sórt sin, go háirithe, diúltú an rochtain is gá a dhámhachtain ar a áitreabh nó a háitreabh nó ar aon limistéar eile a úsáidtear chun críoch gnó, eolas a cheilt nó diúltú é a nochtadh nó eolas bréagach a sholáthar.

In éagmais breithiúnas críochnaitheach nó, i gcás inarb infheidhme, cinneadh riaracháin críochnaitheach sna cásanna dá dtagraítear i bpointí (c) go (i) thuas, déanfaidh an t‑oifigeach údarúcháin atá freagrach duine nó eintiteas a eisiamh ar bhonn réamhaicmiú sa dlí maidir le hiompar dá dtagraítear sna pointí sin, ag féachaint d’fhíorais bhunaithe nó do thorthaí eile atá i moladh ón bpainéal dá dtagraítear in Airteagal 143 den Rialachán Airgeadais. 

Beidh an méid seo a leanas sna fíorais agus sna torthaí dá dtagraítear thuas go háirithe: 

1. fíorais a suíodh i gcomhthéacs imscrúduithe nó iniúchtaí arna ndéanamh ag OIPE, i dtaca leis na Ballstáit sin atá rannpháirteacha sa chomhar feabhsaithe de bhun Rialachán (AE) 2017/1939, don Chúirt Iniúchóirí, don OLAF nó don iniúchóir inmheánach, nó aon seiceáil, iniúchtaí nó rialuithe eile arna ndéanamh faoi fhreagracht an oifigigh údarúcháin;
2. cinntí riaracháin neamhchríochnaitheacha, cinntí ar féidir go n‑áireofar orthu bearta araíonachta arna ndéanamh ag an gcomhlacht maoirseachta inniúil atá freagrach as fíorú a dhéanamh ar chur i bhfeidhm chaighdeáin na heitice gairmiúla;
3. fíorais dá dtagraítear i gcinntí ó dhaoine agus eintitis atá ag cur chun feidhme cistí de chuid an Aontais de bhun phointe (c) den chéad fhomhír d’Airteagal 62(1);
4. cinntí ón gCoimisiún maidir le dlí iomaíochta an Aontais a shárú nó ó údarás inniúil náisiúnta maidir le dlí iomaíochta an Aontais nó dlí iomaíochta náisiúnta a shárú.

Eisiafaidh an t‑oifigeach údarúcháin atá freagrach duine nó eintiteas dá dtagraítear in Airteagal 135(2) FR sna cásanna seo a leanas:

1. go bhfuil duine nádúrtha nó dlítheanach atá ina chomhalta de chomhlacht riaracháin, bainistíochta nó maoirseachta an duine nó an eintitis dá dtagraítear in Airteagal 137(2) den Rialachán Airgeadais (féach freisin thuas), nó ag a bhfuil cumhachtaí ionadaíochta, cinnteoireachta nó rialaithe maidir leis an duine nó leis an eintiteas sin, go bhfuil an duine nádúrtha nó dlítheanach sin i gceann amháin nó níos mó de na staideanna dá dtagraítear i bpointí (c) go (i) thuas;
2. tá duine nádúrtha nó dlítheanach a ghlacann dliteanas neamhtheoranta i leith fhiacha an iarratasóra dá dtagraítear in Airteagal 137(2) i gceann amháin nó níos mó de na staideanna dá dtagraítear i bpointe (a) nó pointe (b) thuas;
3. tá duine nádúrtha atá fíorthábhachtach i leith dhámhachtain nó chur chun feidhme an ghealltanais dhlíthiúil i gceann amháin nó níos mó de na cásanna dá dtagraítear i bpointí (c) go (i) thuas.

Sna cásanna dá dtagraítear in Airteagal 138(3), féadfaidh an t‑oifigeach údarúcháin atá freagrach duine nó eintiteas a eisiamh go sealadach gan moladh ón bpainéal dá dtagraítear in Airteagal 143 den Rialachán Airgeadais, i gcás ina mbeadh garbhaol tromchúiseach ann do leas airgeadais an Aontais dá nglacfadh sé páirt i nós imeachta dámhachtana nó dá roghnófaí é chun cistí de chuid an Aontais a chur chun feidhme. Sna cásanna sin, tarchuirfidh an t‑oifigeach údarúcháin atá freagrach an cás láithreach chuig an bpainéal dá dtagraítear in Airteagal 145 agus déanfaidh sé cinneadh críochnaitheach tráth nach déanaí ná 14 lá tar éis an moladh ón bpainéal a fháil.

An t‑oifigeach údarúcháin atá freagrach, ag féachaint, i gcás inarb iomchuí, don mholadh ón bpainéal dá dtagraítear in Airteagal 145, ní eisiafaidh sé duine ná eintiteas dá dtagraítear in Airteagal 137(2) ó pháirt a ghlacadh i nós imeachta dámhachtana nó ó bheith roghnaithe chun cistí de chuid an Aontais a chur chun feidhme sna cásanna seo a leanas:

1. go ndearna an duine nó an t‑eintiteas bearta feabhais a luaitear in Airteagal 138(10) den Rialachán Airgeadais ar leor iad chun a iontaofacht a léiriú. Ní bheidh feidhm ag an bpointe sin sa chás dá dtagraítear i bpointe (d) d’Airteagal 138(1);
2. go bhfuil sé fíor‑riachtanach chun leanúnachas na seirbhíse a chinntiú, ar feadh fad teoranta agus go dtí go nglacfar na bearta feabhais a luaitear in Airteagal 138(7) den Rialachán Airgeadais;
3. bheadh eisiamh den sórt sin díréireach bunaithe ar na critéir dá dtagraítear in Airteagal 138(3) den Rialachán Airgeadais.

Má chuireann iarratasóir ag a bhfuil eintitis chleamhnaithe an ghníomhaíocht chun feidhme, ní mór dóibh na critéir eisiaimh chéanna leis an bpríomhiarratasóir a chomhlíonadh.

Déanfaidh an t‑oifigeach údarúcháin atá freagrach rannpháirtí a dhiúltú i gcás nós imeachta um dhámhachtain más fíor i gcás iarratasóra:

1. go bhfuil sé i staid eisiaimh arna bunú i gcomhréir le hAirteagal 138;
2. gur thug sé bréagléiriú ar an eolas a éilítear mar choinníoll le páirt a ghlacadh sa nós imeachta, nó mhainnigh sé an t‑eolas sin a sholáthar;
3. go raibh baint aige cheana le doiciméid a ullmhú a úsáideadh i nós imeachta um dhámhachtain agus gur sáraíodh, tríd sin, prionsabal na córa comhionainne, lena n‑áirítear saobhadh iomaíochta nach féidir a leigheas ar shlí eile.

Féadfaidh an Ghníomhaireacht Náisiúnta nó Feidhmiúcháin an t‑eolas seo a leanas a fhoilsiú ar a suíomh gréasáin, ar eolas é a bhaineann leis an eisiamh agus, i gcás inarb infheidhme, leis an bpionós airgeadais sna cásanna dá dtagraítear i bpointí (c) go (i) de mhír 1 thuas:

1. ainm an duine nó an eintitis lena mbaineann;
2. an staid eisiaimh;
3. fad thréimhse an eisiaimh agus/nó méid an phionóis airgeadais.

Tá feidhm ag na critéir eisiaimh seo maidir le hiarratasóirí faoi gach Gníomhaíocht den chlár Erasmus+. I gcomhréir le hAirteagal 199(1)(b) den Rialachán Airgeadais, beidh dearbhú san iarratas ar dheontas ar onóir an iarratasóra i gcomhréir le hAirteagal 139(1) den Rialachán Airgeadais (Dearbhú agus fianaise nach bhfuil staid eisiaimh ann) agus ar chomhlíonadh na gcritéar incháilitheachta (féach thuas) agus roghnúcháin (féach thíos).I gcás tograí arna dtíolacadh thar ceann cuibhreannais, beidh feidhm ag na critéir eisiaimh a bhfuil tuairisc orthu thuas maidir leis na comhaltaí rannpháirteacha uile atá rannpháirteach sa tionscadal.

I gcomhréir le hAirteagal 137(4) agus Airteagal 140 den Rialachán Airgeadais, féadfar pionóis airgeadais a fhorchur ar fhaighteoir cistí ón Aontas lena ndearnadh gealltanas dlíthiúil agus atá i gcás eisiaimh dá dtagraítear in Airteagal 138(1), pointí (c) go (i).

Thairis sin, maidir le cur chun feidhme Gníomhaíochtaí a chumhdaítear i dTreoir an Chláir, measann an Coimisiún go bhfuil na heintitis seo a leanas, nó go bhféadfaidís a bheith, i staid coinbhleacht leasa agus dá bhrí sin níl siad, nó d'fhéadfaí nach mbeidís, incháilithe le bheith rannpháirteach:

• Údaráis Náisiúnta atá i gceannas ar mhaoirseacht a dhéanamh ar Ghníomhaireachtaí Náisiúnta agus ar chur chun feidhme chlár Erasmus+ ina dtír féin, ní féidir leo iarratas a dhéanamh ar aon Ghníomhaíocht, ná páirt a ghlacadh in aon Ghníomhaíocht, a bhainistíonn Gníomhaireachtaí Náisiúnta in aon tír, ach féadfaidh siad iarratas a dhéanamh ar rannpháirtíocht (mar iarratasóirí nó mar chomhpháirtithe) i nGníomhaíochtaí a bhainistíonn an Ghníomhaireacht Feidhmiúcháin nó ag AS EAC mura n‑eisiaitear a leithéid go sainráite le haghaidh na Gníomhaíochta lena mbaineann (mar a léirítear i gCuid B den Treoir);
• Gníomhaireachtaí Náisiúnta (gníomhaíocht aonair a n‑eintitis dhlítheanaigh) nó ranna Gníomhaireachtaí Náisiúnta d’eintitis dhlítheanacha a bhíonn ag déileáil le gníomhaíochtaí lasmuigh de shainchúram Gníomhaireachtaí Náisiúnta, ní fhéadfaidh siad iarratas a dhéanamh ar aon Ghníomhaíocht tríd an Treoirleabhar seo ná ní fhéadfaidh siad a bheith rannpháirteach inti;
• Struchtúir agus líonraí a shainaithnítear nó a ainmnítear sa Chlár Erasmus+ nó in aon Chlár Oibre Bliantúil de chuid an Choimisiúin a ghlactar chun Clár Erasmus+ a chur chun feidhme go sonrach chun ranníocaíocht airgeadais a fháil ón gCoimisiún faoi chur chun feidhme Chlár Erasmus+, atá á n‑óstáil ag an eintiteas dlítheanach a dhéanann an Ghníomhaireacht Náisiúnta a óstáil chomh maith, ní fhéadfaidh siad iarratas a dhéanamh ar aon Ghníomhaíocht, ná páirt a ghlacadh inti, arna bainistiú ag Gníomhaireachtaí Náisiúnta Erasmus+ in aon tír, ach féadfaidh siad iarratas a dhéanamh ar rannpháirtíocht (mar iarratasóirí nó mar chomhpháirtithe) i nGníomhaíochtaí arna mbainistiú ag an nGníomhaireacht Feidhmiúcháin nó ag AS EAC ach amháin má eisiaitear a leithéid go sainráite le haghaidh na Gníomhaíochta lena mbaineann (mar a léirítear i gCuid B den Treoir); ní mór dóibh a bheith in ann a léiriú, sula ndámhtar deontas nó conradh orthu, nach bhfuil coinbhleacht leasa ag baint leo toisc go nglacann siad bearta réamhchúraim nó toisc gurb ann do dheighilt shoiléir idir leasanna mar thoradh ar a n‑eagrúchán inmheánach. Thairis sin, ní mór costais agus ioncaim gach gníomhaíochta dá ndámhtar cistí ón Aontas Eorpach a shainaithint. Is é an Ghníomhaireacht Feidhmiúcháin nó AS EAC, faoina fhreagracht agus faoina chuntasacht féin, ar a ndéanann siad iarratas a ghlacann an cinneadh as a admháil go bhfuil ann do dhearbhú leordhóthanach nach bhfuil coinbhleacht leasa iarbhír i gceist leo;
• Eintitis dhlítheanacha atá ina n‑óstach do Ghníomhaireachtaí Náisiúnta Erasmus+ ach a bhíonn ag déileáil le gníomhaíochtaí eile laistigh nó lasmuigh de shainchúram chlár Erasmus+, mar aon le heintitis atá cleamhnaithe leis na heintitis dhlítheanacha sin, ní fhéadfaidh siad iarratas a dhéanamh ar aon Ghníomhaíocht, ná páirt a ghlacadh in aon Ghníomhaíocht, arna bainistiú ag Gníomhaireachtaí Náisiúnta in aon tír, ach féadfaidh siad i bprionsabal iarratas a dhéanamh ar rannpháirtíocht i nGníomhaíochtaí arna mbainistiú ag an nGníomhaireacht Feidhmiúcháin nó ag AS EAC mura n‑eisiaitear a leithéid go sainráite le haghaidh na Gníomhaíochta lena mbaineann (mar a léirítear i gCuid B den Treoir). Mar sin féin, ní mór dóibh a léiriú, sula ndámhfar deontas nó conradh orthu, nach bhfuil siad i gcoinbhleacht leasa toisc go bhfuil bearta réamhchúraim á nglacadh acu nó toisc gurb ann do dheighilt shoiléir idir leasanna mar thoradh ar a n‑eagrúchán inmheánach (mar shampla scaradh íosta cuntas, scaradh línte tuairiscithe agus cinnteoireachta, bearta chun rochtain ar eolas faoi phribhléid a chosc). Thairis sin, ní mór costais agus ioncaim gach gníomhaíochta dá ndámhtar cistí ón Aontas Eorpach a shainaithint. Is í an Institiúid, faoina freagracht agus faoina cuntasacht féin, ar a ndéanann siad iarratas a ghlacann an cinneadh as a admháil go bhfuil ann do dhearbhú leordhóthanach nach bhfuil coinbhleacht leasa iarbhír i gceist leo.

Bearta sriantacha an Aontais

Tá feidhm ag rialacha speisialta maidir le heintitis áirithe (eintitis atá faoi réir bhearta sriantacha an Aontaisfaoi Airteagal 29 den Conradh ar an Aontas Eorpach (CAE) agus faoi Airteagal 215 den Chonradh ar Fheidhmiú an Aontais Eorpaigh (CFAE)¹⁰ mar shampla). Níl eintitis den sórt sin incháilithe chun rannpháirtiú in aon cháil ar bith, cuir i gcás mar thairbhithe, eintitis chleamhnaithe, comhpháirtithe comhlachaithe, fochonraitheoirí nó faighteoirí tacaíochta airgeadais do thríú páirtithe (más ann dóibh). 

Trí na critéir roghnúcháin, déanann an Ghníomhaireacht Náisiúnta nó Feidhmiúcháin measúnú ar acmhainneacht airgeadais agus oibríochtúil an iarratasóra chun an tionscadal atá beartaithe a chur i gcrích bunaithe ar an eolas a iarrtar san fhoirm iarratais. Ainneoin mhéid an deontais a iarradh, féadfaidh an ghníomhaireacht ábhartha a iarraidh ar an iarratasóir doiciméid agus eolas breise a chur isteach i gcomhréir leis na forálacha thíos.

Acmhainn airgeadais

Ciallaíonn acmhainn airgeadais go bhfuil foinsí maoiniúcháin ag an iarratasóir atá cobhsaí agus sásúil chun a ghníomhaíocht a choinneáil ar bun ar feadh na tréimhse ar lena linn a dhámhtar an deontas agus chun rannpháirtiú i maoiniú na gníomhaíochta.

Déanfar an acmhainneacht airgeadais a fhíorú le haghaidh na gcomhordaitheoirí uile (agus tairbhithe tionscadail aonair san áireamh) de ghnáth, seachas:

• na daoine nádúrtha sin a bhfuil tacaíocht oideachais á fáil acu;
• comhlachtaí poiblí, lena n‑áirítear eagraíochtaí de chuid na mBallstát ¹¹ ;
• eagraíochtaí idirnáisiúnta;
• daoine nó eintitis atá ag cur isteach ar lacáistí ráta úis agus ar fhóirdheontais táillí ráthaíochta arb é is cuspóir do na lacáistí agus na fóirdheontais sin cumas airgeadais tairbhí a neartú nó ioncam a ghiniúint;
• eintitis dhlítheanacha phoiblí, agus institiúidí agus eagraíochtaí i réimsí an oideachais agus na hoiliúna, na hóige agus an spóirt a bhfuil os cionn 50 % dá n‑ioncam bliantúil faighte acu ó fhoinsí poiblí le 2 bhliain anuas¹² ;
• eagraíochtaí idirnáisiúnta;
• mura bhfuil deontas iarrtha an tionscadail níos mó ná EUR 60 000.

Más gá, féadfar é a dhéanamh le haghaidh eintitis chomhlachaithe.

I gcás iarrataí ar dheontas ón Aontas nach mó ná EUR 60 000 agus atá curtha isteach ag cineálacha eile eintiteas seachas na heintitis a luaitear thuas, ní mór d’iarratasóirí dearbhú ar onóir a sholáthar lena ndeimhnítear go bhfuil an acmhainneacht airgeadais acu chun an tionscadal a chur chun feidhme. Roinn shonrach den fhoirm iarratais atá sa dearbhú sin ar onóir. Féadfaidh an ghníomhaireacht ábhartha a iarraidh ar an iarratasóir doiciméid bhreise agus eolas breise a chur isteach.

I gcás iarrataí ar dheontas ón Aontas is mó ná EUR 60 000 agus atá curtha isteach ag cineálacha eile eintiteas seachas na heintitis a luaitear thuas, ní mór don iarratasóir na doiciméid seo a leanas a chur isteach, sa bhreis ar an dearbhú ar onóir, trí Thairseach an Aontais um Dheiseanna Cistiúcháin agus Tairisceana (táb - Clár na Rannpháirtithe – ‘Acmhainneacht airgeadais’) / Córas Clárúcháin Eagraíochtaí:

• Cuntas brabúis agus caillteanais an chomhordaitheora;
• An clár comhardaithe; agus
• Doiciméid eile, má iarradh.

Le haghaidh gníomhaíochtaí a bhainistíonn an Ghníomhaireacht Feidhmiúcháin, le haghaidh breis eolais, féach ‘Rules for Legal Entity Validation, LEAR Appointment and Financial Capacity Assessment’ (Rialacha maidir le Bailíochtú Eintiteas Dlítheanach, Ceapadh LEAR agus Measúnú ar an Acmhainn Airgeadais): https://ec.europa.eu/info/funding-tenders/opportunities/docs/2021-2027/common/guidance/rules-lev-lear-fca_en.pdf

I gcás ina mbainfidh an t‑iarratas le deontais ghníomhaíochta le haghaidh tionscadail a sáraíonn méid an deontais sin EUR 750 000, de bhreis ar an méid thuas, féadfar tuarascáil iniúchóireachta a chuir iniúchóir seachtrach formheasta le chéile a iarraidh i gcás ina mbeidh fáil uirthi, agus i ngach cás ina gceanglaítear le dlí an Aontais nó leis an dlí náisiúnta gur gá iniúchóireacht reachtach a dhéanamh, lena ndeimhneofar na cuntais do suas leis na 3 bliana airgeadais ba dhéanaí a bhfuil fáil orthu. I ngach cás eile, cuirfidh an t‑iarratasóir féindearbhú ar fáil, agus é sínithe ag a ionadaí údaraithe, ina ndeimhnítear bailíocht a chuntas do suas leis na 3 bliana airgeadais ba dhéanaí a bhfuil fáil orthu.

I gcás eintiteas nach féidir leo na doiciméid a luaitear thuas a sholáthar toisc gur eintitis nua‑chruthaithe iad, féadfar dearbhú airgeadais/sonraí airgeadais nó dearbhú árachais ina sonraítear rioscaí airgeadais an iarratasóra a chur in ionad na ndoiciméad thuas.

Níor cheart don chomhordaitheoir na doiciméid sin a uaslódáil ar Thairseach an Aontais um Dheiseanna Cistiúcháin agus Tairisceana (táb - ‘Clár na Rannpháirtithe’ – ‘Acmhainneacht airgeadais) / an Córas Clárúcháin Eagraíochtaí ach amháin nuair a théann seirbhísí fíoraithe lárnacha an Aontais Eorpaigh i dteagmháil leis trí Chlár na Rannpháirtithe nó i gcás ina ndéanann an Ghníomhaireacht Náisiúnta ábhartha amhlaidh chun iarraidh ar an iarratasóir na doiciméid tacaíochta riachtanacha a chur ar fáil. I gcás gníomhaíochtaí arna mbainistiú go díreach ag an nGníomhaireacht Feidhmiúcháin, seolfar an iarraidh sin tríd an gcóras teachtaireachtaí atá leabaithe sa chóras faoi seach.

I gcás tograí a chuirtear isteach thar ceann cuibhreannas comhpháirtithe, i gcás ina mbeadh amhras ar an nGníomhaireacht Náisiúnta nó ar an nGníomhaireacht Feidhmiúcháin faoi acmhainn airgeadais an chuibhreannais, ba cheart di measúnú riosca a dhéanamh ar ar a bhonn a fhéadfar na doiciméid chéanna a léirítear thuas a iarraidh ar na heagraíochtaí rannpháirteacha uile sa chuibhreannas. Tá an méid sin infheidhme gan beann ar an méid a dheonaítear.

Más rud é, tar éis anailís a dhéanamh ar na doiciméid sin, gurb é conclúid na Gníomhaireachta Náisiúnta nó Feidhmiúcháin go bhfuil an acmhainneacht airgeadais lag, ansin féadfaidh sí an méid seo a leanas a dhéanamh:

• eolas breise a iarraidh;
• córas freagrachta airgeadais feabhsaithe a éileamh, is é sin, freagracht chomhpháirteach agus leithleach le haghaidh na gcomhthairbhithe uile nó dliteanas comhpháirteach agus leithleach eintiteas cleamhnaithe;
• a chinneadh réamh‑mhaoiniú a thabhairt atá íoctha ina thráthchodanna;
• a chinneadh réamh‑mhaoiniú (amháin nó níos mó) a thabhairt a chumhdaítear le ráthaíocht bhainc nó;
• cinneadh gan réamh‑mhaoiniú a thabhairt.

Má mheastar go bhfuil an acmhainn airgeadais neamh‑leordhóthanach, diúltófar don togra comhfhreagrach.

Acmhainn oibríochtúil

Ciallaíonn acmhainneacht oibríochtúil go bhfuil na hinniúlachtaí agus na cáilíochtaí gairmiúla is gá ag an iarratasóir chun an tionscadal atá beartaithe a dhéanamh, ar nós acmhainní sásúla i dtéarmaí pearsanra oilte, cáilíochtaí sonracha, taithí ghairmiúil agus teistiméireachtaí sa réimse lena mbaineann, mar aon le hábhair agus trealamh. Féadfar an measúnú ar acmhainneacht oibríochtúil a leathnú chuig an gcomhpháirtíocht ina hiomláine freisin, ós rud é go mbeidh cáilíocht an chur chun feidhme ag brath ar acmhainneacht na n‑eagraíochtaí comhpháirtíochta uile. Ag brath ar mheasúnú riosca, féadfaidh an t‑oifigeach údarúcháin atá freagrach an oibleagáid a tharscaoileadh maidir le hacmhainneacht oibríochtúil comhlachtaí poiblí, eagraíochtaí de chuid na mBallstát nó eagraíochtaí idirnáisiúnta a fhíorú. 

Le haghaidh iarratais a chuirtear faoi bhráid Gníomhaireachtaí Náisiúnta: 

Beidh ar iarratasóirí a n‑acmhainneacht oibríochtúil a léiriú tríd an eolas a sholáthraíonn siad san fhoirm iarratais, ar nós: 

• an eagraíocht/na heagraíochtaí a chur i láthair i gcoitinne;
• próifíl ghinearálta (cáilíochtaí agus taithí) na mball foirne atá freagrach as an tionscadal a bhainistiú agus a chur chun feidhme;
• tuairisc ar chomhdhéanamh an chuibhreannais (más infheidhme).

Ina theannta sin, ní mór d’iarratasóirí dearbhú ar onóir a sholáthar lena ndeimhnítear go bhfuil an acmhainneacht oibríochtúil acu chun an tionscadal a chur chun feidhme. 

Má tá an deontas níos mó ná EUR 60 000, ní mór d’iarratasóirí na nithe seo a leanas a chur isteach in éineacht leis an iarratas:

• liosta d’fhoilseacháin ábhartha de chuid na n‑eagraíochtaí rannpháirteacha¹³ ;
• liosta uileghabhálach de thionscadail agus de ghníomhaíochtaí a rinneadh roimhe seo agus atá ar siúl faoi láthair, ar tionscadail agus gníomhaíochtaí iad atá nasctha leis an réimse beartais nó leis an ngníomhaíocht shonrach. 

I gcás amhrais,¹⁴ féadfaidh an Ghníomhaireacht Náisiúnta foinsí eile eolais a úsáid freisin, ar nós torthaí iniúchtaí roimhe sin, aiseolas ó bhainistíocht tionscadal roimhe sin nó tionscadal atá ann faoi láthair (agus ó Gníomhaireachtaí Náisiúnta chomh maith), tuarascálacha ar chuairteanna monatóireachta nó eolas ó shuíomh gréasáin na heagraíochta nó ó phróifílí na meán sóisialta chun measúnú a dhéanamh ar an acmhainneacht oibríochtúil agus ar an gcumas í a fháil. Féadfaidh an Ghníomhaireacht Náisiúnta doiciméid tacaíochta agus eolas breise a iarraidh freisin chun an fhaisnéis atá san iarratas a fhíorú (amhail CVanna na bpríomhdhaoine atá páirteach sa tionscadal chun a dtaithí ghairmiúil ábhartha a léiriú).

Féadfaidh an Ghníomhaireacht Náisiúnta eolas comhchosúil maidir le heagraíochtaí comhpháirtíochta a iarraidh agus measúnú a dhéanamh uirthi.

Ina theannta sin, iarratasóirí ar chreidiúnú i réimsí an oideachais aosaigh, an ghairmoideachais agus na gairmoiliúna, an oideachais scoile agus na hóige, ní mór ar a laghad taithí 2 bhliain a bheith acu i gcur chun feidhme gníomhaíochtaí chun go mbeidh siad incháilithe mar iarratasóirí ar an gcreidiúnú. Cuirfear san áireamh mar thaithí ábhartha taithí roimh chumaisc nó athruithe struchtúracha comhchosúla ar eintitis phoiblí (mar shampla scoileanna nó ionaid oideachais).

Ní mór comhordaitheoirí cuibhreannais soghluaisteachta a bheith in ann an cuibhreannas a chomhordú de réir an Phlean Erasmus atá beartaithe, chuspóir an chuibhreannais, leithdháileadh beartaithe na gcúraimí, agus chaighdeáin cáilíochta Erasmus (ar nithe iad a chuirtear i láthair ar shuíomh gréasáin Europa: https://ec.europa.eu/programmes/erasmus-plus/sites/erasmusplus2/files/eac-a02-2020-quality-standards.pdf).

Déanfar an dá choinníoll thuas a fhíorú bunaithe ar an iarratas (lena n‑áirítear eolas maidir le rannpháirtíocht roimhe seo an iarratasóra sa chlár Erasmus+ 2014‑2020 agus 2021-2027) agus ar na doiciméid a cuireadh isteach sa Chóras Clárúcháin Eagraíochta. Iarratasóirí nach soláthraíonn an t‑eolas a iarrtar san fhoirm iarratais, nó nach soláthraíonn eolas breise go tráthúil, arna hiarraidh sin don Ghníomhaireacht Náisiúnta, féadfar diúltú dóibh.

Má mheastar nach sásúil an acmhainneacht oibríochtúil, diúltófar don iarratas.

Le haghaidh iarratais a chuirtear faoi bhráid na Gníomhaireachta Náisiúnta: 

Déanfar measúnú ar an acmhainn oibríochtúil i gcomhthráth leis an gcritéar dámhachtana ‘Cáilíocht’, ar bhonn inniúlacht agus thaithí na n‑iarratasóirí agus a bhfoirne tionscadail, lena n‑áirítear acmhainní oibríochtúla (de chineál daonna, teicniúil agus eile).

Meastar go bhfuil acmhainneacht oibríochtúil shásúil ag na hiarratasóirí nuair a chomhlíontar na ceanglais lena dtagraítear don acmhainneacht oibríochtúil a leagtar síos sa ghlao atá ann faoi láthair ar thograí.

Beidh ar iarratasóirí a n‑inniúlacht a léiriú trí bhíthin an eolais seo a leanas san Fhoirm Iarratais (Cuid B):

• próifílí ginearálta (cáilíochtaí agus taithí) na mball foirne atá freagrach as an tionscadal a bhainistiú agus a chur chun feidhme
• tuairisc ar chomhdhéanamh an chuibhreannais
• liosta de thionscadail atá maoinithe ag an Aontas le 4 bliana anuas.

Féadfaidh an Ghníomhaireacht Náisiúnta nó an Ghníomhaireacht Feidhmiúcháin doiciméid tacaíochta bhreise a iarraidh chun an t‑eolas a áirítear san iarratas a fhíorú.

Critéir dhámhachtana

Leis na critéir dhámhachtana, ceadaítear don Ghníomhaireacht Náisiúnta nó Feidhmiúcháin an méid seo a leanas a dhéanamh:

• meastóireacht a dhéanamh ar cháilíocht an tionscadail/na dtograí creidiúnúcháin arna dtíolacadh i bhfianaise na gcuspóirí agus na dtosaíochtaí a leagtar síos faoi chuimsiú Phríomhghníomhaíochtaí Chlár Erasmus+ agus na dtorthaí a bhfuiltear ag súil leo;
• deontais/creidiúnuithe a dhámhachtain i gcomhair tionscadal a mhéadaíonn oiread is féidir éifeachtacht fhoriomlán an chistiúcháin ón Aontas;
• meastóireacht a dhéanamh ar na hiarratais ar dheontais/ar chreidiúnú.

Tograí a bhaineann na tairseacha aonair amach agus an tairseach cháilíochta fhoriomlán, cuirfear san áireamh le haghaidh maoiniú iad, laistigh de theorainneacha bhuiséad an ghlao atá ar fáil. Cuirfear na tograí eile ar an liosta ionadaithe nó dearbhófar nár éirigh leo.

Tá tuairisc i gCuid B den Treoir ar na critéir dhámhachtana a bhfuil feidhm acu maidir le gach ceann de na Gníomhaíochtaí a chuirtear chun feidhme leis an Treoir ar Chlár Erasmus+.

Footnote

1. Treoir (AE) 2017/1371 ó Pharlaimint na hEorpa agus ón gComhairle an 5 Iúil 2017 maidir leis an gcomhrac in aghaidh na calaoise ar leasanna airgeadais an Aontais trí bhíthin an dlí choiriúil (IO L 198, 28.7.2017, lch. 29). ↩ back
2. IO C 316, 27.11.1995, lch. 48. ↩ back
3. IO C 195, 25.6.1997, lch. 1. ↩ back
4. Cinneadh Réime 2003/568/CGB an 22 Iúil 2003 ón gComhairle maidir le héilliú a chomhrac san earnáil phríobháideach (IO L 192, 31.7.2003, lch. 54). ↩ back
5. Cinneadh Réime 2008/841/CGB ón gComhairle an 24 Deireadh Fómhair 2008 maidir leis an gcomhrac i gcoinne na coireachta eagraithe (IO L 300, 11.11.2008, lch. 42). ↩ back
6. Treoir (AE) 2015/849 ó Pharlaimint na hEorpa agus ón gComhairle an 20 Bealtaine 2015 maidir le cosc a chur ar úsáid an chórais airgeadais chun críoch sciúrtha airgid nó maoinithe sceimhlitheoirí, lena leasaítear Rialachán (AE) Uimh. 648/2012 ó Pharlaimint na hEorpa agus ón gComhairle agus lena n‑aisghairtear Treoir 2005/60/CE ó Pharlaimint na hEorpa agus ón gComhairle agus Treoir 2006/70/CE ón gCoimisiún (IO L 141, 5.6.2015, lch. 73). ↩ back
7. Treoir (AE) 2015/849 ó Pharlaimint na hEorpa agus ón gComhairle an 20 Bealtaine 2015 maidir le cosc a chur ar úsáid an chórais airgeadais chun críoch sciúrtha airgid nó maoinithe sceimhlitheoirí, lena leasaítear Rialachán (AE) Uimh. 648/2012 ó Pharlaimint na hEorpa agus ón gComhairle agus lena n‑aisghairtear Treoir 2005/60/CE ó Pharlaimint na hEorpa agus ón gComhairle agus Treoir 2006/70/CE ón gCoimisiún (IO L 141, 5.6.2015, lch. 73). ↩ back
8. Treoir 2011/36/AE ó Pharlaimint na hEorpa agus ón gComhairle an 5 Aibreán 2011 maidir le gáinneáil ar dhaoine a chosc agus a chomhrac agus na híospartaigh atá thíos léi a chosaint, agus a chuirtear in ionad Chinneadh Réime 2002/629/CGB ón gComhairle (IO L 101, 15.4.2011, lch. 1). ↩ back
9. Rialachán (CE, Euratom) Uimh. 2988/95 ón gComhairle an 18 Nollaig 1995 maidir le leasanna airgeadais na gComhphobal Eorpach a chosaint (IO L 312, 23.12.1995, lch. 1). ↩ back
10. Tabhair do d’aire go bhfuil an liosta oifigiúil in  Iris Oifigiúil an Aontais Eorpaigh  agus, i gcás coinbhleachta, go bhfuil tosaíocht ag inneachar liosta na hIrise sin ar  Léarscáil Smachtbhannaí an Aontais  (https://www.sanctionsmap.eu). ↩ back
11. Lena n‑áirítear  scoileanna, institiúidí ardoideachais agus eagraíochtaí i réimsí an oideachais, na hoiliúna, na hóige agus an spóirt a bhfuil os cionn 50 % dá n‑ioncam bliantúil faighte acu ó fhoinsí poiblí le 2 bhliain anuas, measfar go bhfuil an acmhainn airgeadais, ghairmiúil agus riaracháin riachtanach acu chun gníomhaíochtaí faoin gClár a chur i gcrích. ↩ back
12. Airteagal 21(3) de Rialachán (AE) 2021/817 lena mbunaítear Erasmus+;  measfar nach mbeidh deontais tionscadail náisiúnta, Eorpacha ná deontais tionscadail eile ina gcistí poiblí le haghaidh na seiceála acmhainneachta airgeadais. ↩ back
13. Ní infheidhme an ceanglas sin ach amháin má tá foilseacháin atá ábhartha don réimse beartais nó don ghníomhaíocht shonrach táirgthe ag na heagraíochtaí rannpháirteacha. ↩ back
14. Tá feidhm ag an méid sin maidir le méid deontais ar bith. ↩ back