L-Azzjonijiet appoġġati taħt din l-Azzjoni Ewlenija huma mistennija jġibu effetti pożittivi u dejjiema fuq il-parteċipanti u l-organizzazzjonijiet parteċipanti involuti, kif ukoll fuq is-sistemi tal-politika fejn tali attivitajiet ikunu integrati. 

Fir-rigward tal-istudenti tal-iskola, l-istudenti, t-trainees, l-apprendisti, l-istudenti adulti u ż-żgħażagħ, l-attivitajiet tal-mobbiltà appoġġati minn din l-Azzjoni Ewlenija għandhom jipproduċu wieħed jew aktar mill-eżiti li ġejjin: 

• titjib fil-prestazzjoni tal-apprendiment
• tisħiħ tal-impjegabbiltà u titjib fil-prospetti tal-karriera
• sens akbar ta’ inizjattiva u ta’ intraprenditorija
• emanċipazzjoni u awtostima akbar
• titjib fil-kompetenzi tal-lingwa barranija u diġitali
• tisħiħ tas-sensibilizzazzjoni interkulturali
• parteċipazzjoni aktar attiva fis-soċjetà
• tisħiħ tal-interazzjonijiet pożittivi ma’ persuni minn sfondi differenti
• sensibilizzazzjoni aħjar dwar il-proġett Ewropew u l-valuri tal-UE
• motivazzjoni akbar biex jieħdu sehem f’taħriġ jew edukazzjoni (formali/mhux formali) fil-ġejjieni wara l-perjodu ta’ mobbiltà barra mill-pajjiż.

Fir-rigward tal-persunal, il-persuni li jaħdmu maż-żgħażagħ u l-professjonisti involuti fl-edukazzjoni, it-taħriġ u ż-żgħażagħ, l-attivitajiet ta’ mobbiltà huma mistennija li jipproduċu wieħed jew aktar mill-eżiti li ġejjin: 

• kompetenzi mtejba, marbuta mal-profili okkupazzjonali tagħhom (tagħlim, taħriġ, ħidma fost iż-żgħażagħ, eċċ.)
• fehim aħjar tal-prattiki, il-politiki u s-sistemi fl-edukazzjoni, it-taħriġ jew il-ħidma fost iż-żgħażagħ bejn il-pajjiżi
• kapaċità akbar biex jiġu skattati bidliet f’termini ta’ modernizzazzjoni u ftuħ internazzjonali fi ħdan l-organizzazzjonijiet edukattivi tagħhom
• fehim akbar tal-interkonnessjonijiet bejn l-edukazzjoni formali u dik mhux formali, it-taħriġ vokazzjonali u s-suq tax-xogħol rispettivament
• kwalità aħjar tax-xogħol u l-attivitajiet tagħhom favur l-istudenti tal-iskola, it-trainees, l-apprendisti, l-istudenti, l-istudenti adulti u ż-żgħażagħ
• fehim u rispons akbar għat-tipi kollha ta’ diversità, eż. id-diversità soċjali, etnika, lingwistika, tal-ġeneri u kulturali kif ukoll ħiliet diversi
• kapaċità akbar biex jiġu indirizzati l-ħtiġijiet ta’ persuni b’inqas opportunitajiet
• żieda fl-appoġġ u l-promozzjoni ta’ attivitajiet ta’ mobbiltà għall-istudenti
• żieda fl-opportunitajiet għall-iżvilupp professjonali u tal-karriera
• titjib fil-kompetenzi tal-lingwa barranija u diġitali
• żieda fil-motivazzjoni u fis-sodisfazzjon fix-xogħol ta’ kuljum tagħhom.

L-attivitajiet appoġġati taħt din l-Azzjoni huma mistennija wkoll jipproduċu l-eżiti li ġejjin fuq l-organizzazzjonijiet parteċipanti: 

• Żieda fil-kapaċità sabiex joperaw fil-livell tal-UE/internazzjonali: ħiliet ta’ ġestjoni u strateġiji ta’ internazzjonalizzazzjoni mtejba; isaħħu l-kooperazzjoni ma’ sħab minn pajjiżi oħrajn; allokazzjoni akbar ta’ riżorsi finanzjarji (minbarra fondi tal-UE) biex jiġu organizzati proġetti tal-UE/internazzjonali; kwalità aħjar fit-tħejjija, l-implimentazzjoni, il-monitoraġġ u s-segwitu ta’ proġetti tal-UE/internazzjonali;
• Mod innovattiv u mtejjeb ta’ operazzjoni lejn il-gruppi fil-mira tagħhom, billi jipprovdu pereżempju: programmi aktar attraenti għal studenti, trainees, apprendisti u żgħażagħ b’mod konformi mal-ħtiġijiet u l-aspettattivi tagħhom; kwalifiki mtejba tal-persunal ta’ tagħlim u taħriġ; proċessi mtejba ta’ rikonoxximent u validazzjoni ta’ kompetenzi miksuba matul il-perjodi ta’ apprendiment barra l-pajjiż; attivitajiet aktar effettivi għall-benefiċċju tal-komunitajiet lokali, metodi u prattiki mtejba tal-ħidma fost iż-żgħażagħ sabiex jiġu involuti b’mod attiv iż-żgħażagħ u/jew jiġu indirizzati gruppi żvantaġġati, eċċ;
• Ambjent aktar modern, dinamiku, impenjat u professjonali ġewwa l-organizzazzjoni: lesti li jintegraw prattiki tajba u metodi ġodda fl-attivitajiet ta’ kuljum; miftuħa għal sinerġiji ma’ organizzazzjonijiet attivi f’oqsma soċjali, edukattivi u ta’ impjiegi differenti; l-ippjanar b’mod strateġiku tal-iżvilupp professjonali tal-persunal tagħhom b’rabta mal-ħtiġijiet individwali u l-objettivi organizzattivi; iż-żamma tal-komunikazzjoni, it-trasferiment tal-għarfien u s-sensibilizzazzjoni tat-titjib jekk rilevanti u l-kapaċità li jattiraw studenti u persunal akkademiku eċċellenti mid-dinja kollha.

Fuq perjodu twil, l-effett ikkombinat tal-bosta eluf ta’ proġetti appoġġati taħt din l-Azzjoni Ewlenija huwa mistenni li jħalli impatt fuq is-sistemi tal-edukazzjoni, it-taħriġ u ż-żgħażagħ fil-pajjiżi parteċipanti, biex b’hekk jistimola r-riformi tal-politika u jattira riżorsi ġodda għall-opportunitajiet ta’ mobbiltà fl-Ewropa u lil hinn minnha. 

F’dan ir-rigward, fl-2025, il-Programm se jkompli jiġi mobilizzat ukoll biex jimmitiga l-konsegwenzi soċjoekonomiċi u edukattivi tal-invażjoni Russa fl-Ukrajna billi jappoġġa proġetti ta’ mobbiltà li jiffaċilitaw l-integrazzjoni tal-persuni li qed jaħarbu mill-gwerra fl-Ukrajna.