Is féidir le heagraíochtaí atá gníomhach i réimsí an oideachais, na hoiliúna agus na hóige tacaíocht ó Chlár Erasmus+ a fháil chun tionscadail a dhéanamh lena gcuirtear cineálacha difriúla soghluaisteachta chun cinn. Tá na céimeanna seo a leanas i gceist le tionscadal soghluaisteachta: 

• pleanáil (lena n‑áirítear na torthaí foghlama agus formáidí na gníomhaíochta a shainiú, an clár oibre a fhorbairt, agus na gníomhaíochtaí a sceidealú)
• ullmhú (lena n‑áirítear socruithe praiticiúla, roghnú rannpháirtithe, comhaontuithe a chur ar bun le comhpháirtithe agus rannpháirtithe, rannpháirtithe a ullmhú ó thaobh foghlaim teanga/idirchultúrtha de agus ó thaobh na gcúraimí de roimh imeacht);
• cur chun feidhme na ngníomhaíochtaí soghluaisteachta
• obair leantach (lena n‑áirítear an mheastóireacht ar na gníomhaíochtaí, torthaí foghlama na rannpháirtithe a bhailíochtú agus a aithint go foirmiúil (i gcás inarb infheidhme), chomh maith le scaipeadh agus úsáid thorthaí an tionscadail). 

Leis an gClár Erasmus+ treisítear an tacaíocht a thairgtear do na rannpháirtithe i ngníomhaíochtaí soghluaisteachta chun feabhas a chur ar a n‑inniúlachtaí teanga iasachta roimh a dtréimhse fanachta ar an gcoigríoch agus lena linn, lena n‑áirítear deontas breise le haghaidh tacaíocht teanga le haghaidh rannpháirtithe soghluaisteachta fadtéarmaí i réimsí an ghairmoideachais agus na gairmoiliúna agus an oideachais scoile. Le seirbhís tacaíochta teanga ar líne (OLS) Erasmus+ soláthraítear an deis do na rannpháirtithe i ngníomhaíochtaí soghluaisteachta measúnú a dhéanamh ar an eolas atá acu ar theangacha chomh maith le cúrsaí teanga a leanúint ar líne chun a n‑inniúlachtaí a fheabhsú. 

Thairis sin, cuirtear spás ar fáil le Erasmus+ chun gníomhaíochtaí soghluaisteachta a fhorbairt ina rannpháirtíonn eagraíochtaí comhpháirtíochta ó chúlraí difriúla agus iad gníomhach i réimsí nó in earnálacha socheacnamaíocha difriúla (mar shampla, cúrsaí oiliúna do mhic léinn ollscoile nó foghlaimeoirí i ngairmoideachas agus gairmoiliúint i bhfiontair, eagraíochtaí neamhrialtasacha, comhlachtaí poiblí; múinteoirí i scoileanna a leanann cúrsaí forbartha gairmiúla i gcuideachtaí nó i lárionaid oiliúna; saineolaithe gnó a thugann léachtaí in institiúidí ardoideachais, srl.).

Is é an tríú gné thábhachtach den nuálaíocht agus de cháilíocht na ngníomhaíochtaí soghluaisteachta go bhfuil an fhéidearthacht ag eagraíochtaí rannpháirteacha Erasmus+ gníomhaíochtaí soghluaisteachta a eagrú laistigh de chreat straitéiseach níos leithne agus sa mheántéarma. Trí iarratas aonair ar dheontas, beidh comhordaitheoir tionscadail soghluaisteachta in ann roinnt gníomhaíochtaí soghluaisteachta a eagrú, rud a fhágann go mbeidh go leor daoine aonair in ann dul go dtí an choigríoch chuig tíortha éagsúla. Dá bharr sin, faoi Erasmus+, beidh na hiarratasóirí in ann a dtionscadal a cheapadh i gcomhréir le riachtanais na rannpháirtithe, ach de réir a bpleananna inmheánacha le haghaidh an idirnáisiúnaithe, an fhothaithe acmhainneachta agus an nuachóirithe freisin.

Tá ról tábhachtach ag scéimeanna creidiúnúcháin chun tionchar ard Phríomhghníomhaíocht 1 a chinntiú. Le Cairt Ardoideachais Erasmus (ECHE), creidiúnú Erasmus le haghaidh cuibhreannais soghluaisteachta ardoideachais agus creidiúnuithe Erasmus i réimsí an ghairmoideachais agus na gairmoiliúna, an oideachais scoile, an oideachais aosaigh, agus na hóige, is féidir le heagraíochtaí rochtain shimplithe a fháil ar dheontais le linn thréimhse chur chun feidhme a gcreidiúnaithe, rud a fhágann gur féidir leo díriú ar chuspóirí níos fadtéarmaí agus ar an tionchar ar leibhéal institiúideach.

Tacaítear leis na cineálacha tionscadal soghluaisteachta seo a leanas faoi Phríomhghníomhaíocht 1 den Chlár Erasmus+, ag brath ar phróifíl na rannpháirtithe atá i gceist:

I réimse an Oideachais agus na hOiliúna:

• Tionscadail soghluaisteachta le haghaidh mic léinn agus baill foirne ardoideachais
• Tionscadail soghluaisteachta le haghaidh foghlaimeoirí agus baill foirne i ngairmoideachas agus gairmoiliúint
• Tionscadail soghluaisteachta le haghaidh daltaí scoile agus baill foirne na scoile
• Tionscadail soghluaisteachta le haghaidh foghlaimeoirí agus baill foirne san oideachas aosach.

I réimse na hÓige:

• Tionscadail soghluaisteachta do dhaoine óga – malartuithe Ógra
• Tionscadail soghluaisteachta le haghaidh oibrithe óige
• Gníomhaíochtaí um rannpháirtíocht óige
• Gníomhaíocht Cuimsithe DiscoverEU.

I réimse an Spóirt: 

• Soghluaisteacht foirne i réimse an spóirt.

Sna ranna thíos soláthraítear eolas mionsonraithe faoi na critéir agus na coinníollacha ag a bhfuil feidhm maidir le gach cineál tionscadail soghluaisteachta.