Cad is aidhm dóibh?

Tá Ollúnachtaí Jean Monnet ceaptha an méid seo a leanas a dhéanamh:

• teagasc léann an Aontais Eorpaigh a neartú atá ina dhlúthchuid den churaclam oifigiúil in institiúid ardoideachas
• grinnteagasc a chur ar fáil i réimsí a bhaineann leis an Aontas agus a bhfuil éileamh méadaitheach orthu sa mhargadh saothair

Spreagtar Ollúnachtaí Jean Monnet freisin chun acmhainní oideachais oscailte a chur ar fáil agus gníomhaíochtaí oideachais oscailte a chur san áireamh ina gcuid oibre ar mhaithe le solúbthacht agus inrochtaineacht an léinn a fheabhsú.

Cén deis atá ann?

Is féidir le hinstitiúidí ardoideachais post d’ollamh ollscoile a óstáil a bhfuil léann an Aontais Eorpaigh mar shainréimse aige.

Beifear ag súil go dtacóidh na hinstitiúidí ardoideachais le teagasc, le taighde agus le gníomhaíochtaí machnamhacha an Ollaimh, ionas go rachaidh siad chun tairbhe do réimse leathan cúrsaí san institiúid.

Cén chaoi a n-oibríonn sé?

Ní mór don eagraíocht a chuireann iarratas isteach ar bhall foirne buan a bheith ina hInstitiúid Ardoideachais agus í lonnaithe in áit ar bith ar domhan. Más i dTír Cláir atá an institiúid ardoideachais lonnaithe, caithfidh Cairt Ardoideachais Erasmus (ECHE) bhailí a bheith ag an institiúid sin. 

Ní theastaíonn ECHE ó na cinn atá bunaithe i dtíortha comhpháirtíochta. 

Níl an deis seo ar fáil do dhaoine aonair.

Fad agus gníomhaíochtaí

Ní mór d’Ollúnacht Jean Monnet maireachtáil ar feadh 3 bliana, agus ní mór fad íosta 90 uair an chloig teagaisc a bheith i gceist leis in aghaidh na bliana acadúla i réimse Léann an Aontais Eorpaigh san Institiúid Ardoideachais is iarratasóir ag an sealbhóir Ollúnachta.

Ní mór don Ollamh gníomhaíocht bhreise amháin ar a laghad a dhéanamh in aghaidh na bliana acadúla.

Cé is moite den teagasc aonair, áirítear leis na 90 uair an chloig sin léachtaí ranga, seimineáir agus ranganna teagaisc, cianteagasc san áireamh.

Ba cheart do shealbhóir na hOllúnachta a bheith ar fhoireann na hinstitiúide is iarratasóir agus stádas ‘Ollamh’ aige; Ní ceadmhach dóibh a bheith ina n-ollamh ar cuairt tráth déanta an iarratais.

Deontas

Is é €60,000 an deontas uasta in aghaidh an Ollúnachta.

Cén t-eolas eile is ceart a bheith agat?

I gcás inar gá duine eile a theacht in ionad shealbhóir na hOllúnachta, ní mór iarraidh a sheoladh i scríbhinn chuig an nGníomhaireacht Feidhmiúcháin Eorpach um Oideachas agus Cultúr, agus ní mór don ionadaí a bheith ar aon leibhéal speisialtóireachta leis an Ollamh atá ag imeacht.

Tuilleadh eolais

Is é an Treoirleabhar Erasmus+ an phríomhfhoinse eolais faoi Ollúnachtaí Jean Monnet, ach mar sin féin, tá tuilleadh eolais faoin bpróiseas iarratais le fáil ón nGníomhaireacht Feidhmiúcháin Eorpach um Oideachas agus Cultúr.

Chun tuilleadh eolais a fháil is féidir teagmháil a dhéanamh leis an nGníomhaireacht Feidhmiúcháin Eorpach um Oideachas agus Cultúr nó is féidir leat teagmháil a dhéanamh leis an gCoimisiún Eorpach.