Ħarsa ġenerali

L-Erasmus+ jappoġġja perjodi ta’ tagħlim f’istituzzjonijiet ta’ edukazzjoni u taħriġ vokazzjonali (VET) barra l-pajjiż.

Jekk taħdem fil-VET, tista’ tqatta’ ħin tgħallem f’organizzazzjoni oħra f’pajjiżi assoċjati mal-Erasmus (preċedentement magħrufa bħala l-Pajjiżi tal-Programm Erasmus+).

Eżempji ta’ organizzazzjonijiet bħal dawn jinkludu negozji, korpi pubbliċi, sħab soċjali, istituzzjonijiet ta’ riċerka u organizzazzjonijiet mhux governattivi.

Kif tapplika

Int ma tistax tapplika għal għotja bħala individwu. L-applikazzjonijiet iridu jsiru minn istituzzjonijiet tal-VET li min-naħa tagħhom jagħżlu l-kandidati għall-assenjamenti ta’ tagħlim u taħriġ barra l-pajjiż mill-istaff tagħhom.

L-għażla tal-istaff biex jgħallem barra l-pajjiż għandha tkun ġusta, inklużiva, trasparenti u ddokumentata kif xieraq.

L-organizzazzjonijiet jistgħu jistiednu trainers, għalliema, esperti fil-politika jew professjonisti kkwalifikati oħrajn minn barra l-pajjiż li jistgħu jgħinuhom itejbu t-tagħlim, it-taħriġ u l-apprendiment fl-organizzazzjoni riċeventi. L-organizzazzjonijiet jistgħu wkoll jospitaw għalliema li jkunu qegħdin jitħarrġu li jkunu jixtiequ jwettqu traineeship barra l-pajjiż.

Tul ta’ żmien

Assenjament ta’ tagħlim irid idum mhux inqas minn jumejn u jista’ jdum sa sena. Dan jeskludi ż-żmien tal-ivvjaġġar.

Kundizzjonijiet

Biex tgħallem barra minn pajjiżek mal-Erasmus+, l-istituzzjoni tal-VET tiegħek trid tapplika biex tikseb akkreditazzjoni tal-Erasmus fil-qasam tal-VET jew biex tipparteċipa fi proġett ta’ mobbiltà għal żmien qasir. Fiż-żewġ każijiet, l-organizzazzjonijiet għandhom jaderixxu ma’ sett ta’ standards ta’ kwalità għal proġetti ta’ mobbiltà dwar prattiki ta’ ġestjoni tajba, jipprovdu kwalità u appoġġ lill-parteċipanti, u jikkondividu r-riżultati u l-għarfien dwar il-programm. 

Qabel tibda l-perjodu ta’ tagħlim tiegħek, int, l-istituzzjoni tiegħek u l-organizzazzjoni riċeventi tiffirmaw Ftehim dwar il-Mobbiltà. Dan id-dokument jistabbilixxi l-għanijiet, id-drittijiet u r-responsabbiltajiet tiegħek u wkoll kif se jiġi formalment rikonoxxut il-perjodu ta’ tagħlim.

Appoġġ finanzjarju

L-għotjiet tal-UE jitħallsu lill-organizzazzjoni li qed tikkoordina (l-istituzzjoni tiegħek jew il-koordinatur tal-konsorzju) u huma mfassla biex ikopru l-ispejjeż tal-ivvjaġġar u sussistenza tiegħek matul iż-żmien li tqatta’ barra l-pajjiż, kif ukoll joffru appoġġ organizattiv lill-istituzzjonijiet parteċipanti.

Barra minn hekk, il-programm Erasmus+ jipprovdi mezzi biex tiġi appoġġjata l-inklużjoni ta’ parteċipanti b’inqas opportunitajiet.

Skopri aktar

Ikkuntattja lill-istituzzjoni tal-VET tiegħek biex issir taf jekk dawn l-opportunitajiet humiex disponibbli għalik.

Ikkonsulta l-Gwida tal-Programm Erasmus+ għad-dettalji dwar il-kriterji tal-għoti u tal-eliġibbiltà u r-regoli dwar il-finanzjament.

L-Aġenziji Nazzjonali jistgħu jgħinuk bil-mistoqsijiet u l-applikazzjonijiet.