Tosaíochtaí an chláir

Tá ceithre thosaíocht laistigh de chlár Erasmus+ (2021-2027) mar atá faoi láthair. Tugtar ‘tosaíochtaí cothrománacha’ orthu sin, agus tá feidhm acu maidir le gach gníomhaíocht sa chlár. Léiríonn siad comhluachanna Eorpacha agus freagraíonn siad ar na príomhdhúshláin inár sochaithe sa lá atá inniu ann.

Má tá togra tionscadail á cheapadh agat féin nó ag d’eagraíocht, nó má tá gníomhaíochtaí do thionscadail maoinithe á bpleanáil agat, ba cheart duit na tosaíochtaí sin a chur san áireamh.

Tugann na tosaíochtaí idir threoir agus spreagadh do thionscadail de gach cineál – ó ghníomhaíochtaí soghluaisteachta áitiúla go comhar idirnáisiúnta – agus cuidíonn siad leis an gclár a dhéanamh níos cuimsithí, níos inbhuanaithe, níos digití agus níos daonlathaí.

Seo a leanas forléargas ar na ceithre thosaíocht, agus samplaí de thionscadail le haghaidh gach ceann acu.

An cuimsiú agus an éagsúlacht

Cuireann Erasmus+ comhionannas deiseanna agus rochtain do chách chun cinn. Spreagtar tionscadail chun tacú le rannpháirtithe ar lú na deiseanna atá acu — mar shampla, daoine faoi mhíchumas, daoine ó chúlraí faoi mhíbhuntáiste nó ó cheantair iargúlta, nó daoine a bhfuil bacainní sóisialta, eacnamaíocha nó oideachais rompu.

Baineann an cuimsiú leis an éagsúlacht a aithint agus meas a léiriú uirthi, sin agus a chinntiú go dtéann Erasmus+ i gcion ar dhaoine ó gach cúlra.

Is éard atá i gceist le cuimsiú a chothú timpeallachtaí foghlama a dhéanamh níos inrochtana, níos cothroime agus níos fáiltí. Ba cheart do thionscadail féachaint ar an gcaoi le bacainní ar rannpháirtíocht a bhaint agus tacú le bealaí fóinteacha chun páirt a ghlacadh i ngrúpaí faoi ghannionadaíocht.

An comhshaol agus an comhrac in aghaidh an athraithe aeráide

Tacaíonn Erasmus+ le cosaint an chomhshaoil agus leis an aistriú glas trí thionscadail a spreagadh lena músclaítear feasacht ar shaincheisteanna comhshaoil, lena gcuirtear stíleanna maireachtála inbhuanaithe chun cinn, agus lena bhforbraítear na scileanna a theastaíonn ó dhaoine chun gníomhú ar son na haeráide.

Is féidir le tionscadail díriú ar oideachas le haghaidh forbairt inbhuanaithe, topaicí glasa a chomhtháthú san fhoghlaim fhoirmiúil nó sheachfhoirmiúil, nó nuálaíocht a chur chun cinn i réimsí a bhaineann leis an aistriú éiceolaíoch.

Bíodh sé tríd an tsoghluaisteacht ghlas, trí bhainistiú tionscadal atá neamhdhíobhálach don chomhshaol nó trí churaclaim atá dírithe ar an inbhuanaitheacht, tá ról tábhachtach ag Erasmus+ maidir leis na hinniúlachtaí is gá a thabhairt d’fhoghlaimeoirí agus d’oideoirí le haghaidh todhchaí níos glaise.

An claochlú digiteach

Tá scileanna digiteacha ríthábhachtach don fhoghlaim, don teagasc agus don obair sa lá atá inniu ann. Spreagann Erasmus+ úsáid uirlisí agus modhanna digiteacha, tacaíonn sé leis an bhfoghlaim chumaisc agus leis an bhfoghlaim ar líne, agus cuidíonn sé le daoine muinín a fháil chun an teicneolaíocht a úsáid ar bhealaí fiúntacha.

Is féidir le tionscadail litearthacht dhigiteach a chur chun cinn, inniúlachtaí digiteacha na n-institiúidí oideachais agus oiliúna a neartú, agus cuidiú le dul i ngleic leis an deighilt dhigiteach.

Rannpháirtíocht sa saol daonlathach

Cuireann Erasmus+ ceart na saoránach páirt a ghlacadh sa saol daonlathach chun cinn, agus spreagann sé rannpháirtíocht ghníomhach ar gach leibhéal: áitiúil, náisiúnta agus Eorpach. Is féidir le tionscadail deiseanna fiúntacha a chruthú do rannpháirtithe a dtuairimí a chur in iúl, cur le cinntí, agus muintearas níos láidre leis an bpobal Eorpach a fhorbairt.

Tugtar tosaíocht do thionscadail a chuireann rannpháirtíocht ina gcroílár agus a théann i dteagmháil go díreach le spriocghrúpaí maidir le gníomhaíochtaí a mhúnlú agus a chur i gcrích.

Tríd an bhfoghlaim fhoirmiúil agus sheachfhoirmiúil araon, tacaíonn Erasmus+ le forbairt príomhinniúlachtaí amhail smaointeoireacht chriticiúil, litearthacht sna meáin, scileanna sibhialta agus idirchultúrtha, agus tuiscint ar luachanna comhroinnte an Aontais.

An chaoi le haghaidh a thabhairt ar na tosaíochtaí sin

Tá eolas mionsonraithe faoi thosaíochtaí Erasmus+ le fáil i dtreoirleabhar Erasmus+. Beidh ort iad sin a bheith ar eolas agat agus d’iarratas nó do ghníomhaíochtaí tionscadail á n-ullmhú agat.

Faigh míniú iomlán ar thosaíochtaí Erasmus+