Profil tal-applikant

• Istituzzjonijiet ta’ edukazzjoni għolja fi kwalunkwe pajjiż tad-dinja

Dawk stabbiliti fil-Pajjiżi tal-Programm Erasmus+ irid ikollhom Karta Erasmus għall-Edukazzjoni Għolja (ECHE) valida.

Tul ta’ żmien: 3 snin, b’tul ta’ żmien minimu ta’ 40 siegħa ta’ tagħlim għal kull sena akkademika fl-istituzzjoni ta’ edukazzjoni għolja applikanti.

Is-sigħat ta’ tagħlim jistgħu jinkludu s-sigħat ta’ kuntatt dirett fil-kuntest tal-lezzjonijiet fi grupp, tas-seminars, tas-sessjonijiet ma’ tuturi u jistgħu jinkludu kwalunkwe waħda minn dawn li ssemmew f’forma ta’ tagħlim mill-bogħod iżda ma jinkludux struzzjoni individwali.

Għotja massima: €35,000

X’jikkwalifika bħala Modulu Jean Monnet fl-Edukazzjoni Għolja?  

Programm jew kors qasir ta’ tagħlim fil-qasam tal-istudji tal-Unjoni Ewropea f’istituzzjoni ta’ edukazzjoni għolja, li jiffoka fuq dixxiplina partikolari waħda jew approċċ multidixxiplinari, u li jkun wieħed minn dawn li ġejjin:

• korsijiet ġenerali jew introduttorji dwar il-kwistjonijiet tal-Unjoni Ewropea (b’mod partikolari fl-istituzzjonijiet u fil-fakultajiet li għad ma għandhomx offerta ta’ korsijiet żviluppata ħafna fil-qasam);
• tagħlim speċjalizzat dwar l-iżviluppi fl-Unjoni Ewropea (b’mod partikolari fl-istituzzjonijiet u fil-fakultajiet li diġà għandhom offerta ta’ korsijiet żviluppata ħafna fil-qasam); jew
• korsijiet tas-sajf u intensivi li huma rikonoxxuti b’mod sħiħ.

X’inhu mistenni mill-istituzzjoni ta’ edukazzjoni għolja li tospita Modulu Jean Monnet?

Il-Moduli Jean Monnet huma meħtieġa biex iwasslu kontenut tal-UE innovattiv, interessanti u speċifiku lill-istudenti tagħhom; huma għandhom ukoll ixerrdu u jisfruttaw ir-riżultati tal-attivitajiet organizzati tat-tagħlim u tar-riċerka lil hinn mill-ambitu tal-partijiet ikkonċernati involuti direttament.

Il-koordinaturi tal-Moduli Jean Monnet huma mħeġġa:

• jippubblikaw tal-inqas artiklu wieħed rieżaminat bejn il-pari matul il-perjodu tal-għotja;
• jieħdu sehem fl-avvenimenti ta’ tixrid u ta’ informazzjoni fil-livell nazzjonali u Ewropew;
• jorganizzaw avvenimenti (lekċers, seminars, workshops, eċċ.) ma’ dawk li jfasslu l-politika fil-livell lokali (eż. sindki u konsulenti), reġjonali u nazzjonali;
• ixerrdu r-riżultati tal-attivitajiet tagħhom permezz tal-organizzazzjoni ta’ seminars jew ta’ lekċers immirati u adattati għall-pubbliku ġenerali u għar-rappreżentanti tas-soċjetà ċivili;
• jibnu kuntatti ma’ koordinaturi oħra tal-Moduli, taċ-Ċentri ta’ Eċċellenza, tal-Katedri Jean Monnet u tal-Istituzzjonijiet appoġġati;
• japplikaw riżorsi edukattivi miftuħa, jippubblikaw is-sommarji, il-kontenut u l-iskeda tal-attivitajiet tagħhom kif ukoll ir-riżultati mistennija.