X’inhu l-għan?

Il-Katedri Jean Monnet huma maħsuba biex:

• japprofondixxu t-tagħlim fl-istudji fuq l-UE inklużi fil-kurrikulu uffiċjali ta’ istituzzjoni tal-edukazzjoni għolja
• jipprovdu tagħlim profond dwar kwistjonijiet tal-UE f’oqsma li d-domanda għalihom fis-suq tax-xogħol dejjem tikber

Il-Katedri Jean Monnet jitħeġġu wkoll jipprovdu riżorsi edukattivi miftuħa u jinvolvu attivitajiet edukattivi miftuħa fix-xogħol tagħhom biex iżidu l-flessibilità tal-apprendiment u l-aċċessibilità tiegħu.

X’inhi l-opportunità?

L-istituzzjonijiet tal-edukazzjoni għolja (HEIs, Higher education institutions) jistgħu joffru pożizzjoni ta’ għalliem bi speċjalizzazzjoni fl-istudji fuq l-UE għall-professuri universitarji.

L-HEIs parteċipanti mistennija jappoġġaw lid-detentur tal-Katedra fl-attivitajiet ta’ tagħlim, riċerka u riflessjoni tiegħu, u jippermettu lil firxa wiesgħa ta’ kurrikuli jibbenefikaw mill-korsijiet.

Kif taħdem din il-ħaġa?

Organizzazzjoni li tkun biħsiebha tapplika għal membru tal-persunal permanenti trid tkun HEI stabbilita fi kwalunkwe pajjiż. Jekk l-HEI tkun tinsab f’pajjiż tal-programm, din irid ikollha Karta Erasmus għall-Edukazzjoni Għolja (ECHE, Erasmus Charter for Higher Education) valida. 

Dawk fil-pajjiżi sħab ma jeħtiġux ECHE. 

Din l-opportunità mhijiex disponibbli għall-individwi.

Durata u attivitajiet

Katedra Jean Monnet irid ikollha durata ta’ 3 snin u mill-inqas 90 siegħa ta’ tagħlim f’sena akkademika fil-qasam tal-istudji fuq l-Unjoni Ewropea fl-istituzzjoni tal-edukazzjoni għolja applikanti min-naħa tad-detentur tal-Katedra.

Detentur tal-katedra jrid ukoll iwettaq tal-inqas attività addizzjonali kull sena akkademika.

Id-90 siegħa jinkludu lekċers fi grupp, seminars, u tutorials, inkluż fil-format ta’ tagħlim mill-bogħod, iżda mhux struzzjoni individwali.

Detentur tal-Katedra jrid ikun membru permanenti tal-persunal fl-istituzzjoni applikanti bil-grad ta’ “Professur”; ma jistax ikun professur mistieden meta japplika.

Għotja

L-għotja massima għal kull Katedra hija ta’ €60,000.

X’hemm iktar li għandek tkun taf?

Jekk ikun meħtieġ li detentur tal-Katedra jiġi sostitwit, trid tintbagħat talba bil-miktub lill-Aġenzija Eżekuttiva Ewropea għall-Edukazzjoni u għall-Kultura, u s-sostitut propost irid ikollu l-istess livell ta’ speċjalizzazzjoni tad-detentur tal-Katedra li dan ikun se jissostitwixxi.

Skopri aktar

Il-gwida tal-programm Erasmus+ hi s-sors ewlieni ta’ informazzjoni dwar il-Katedri Jean Monnet, għalkemm hi disponibbli aktar informazzjoni dwar il-proċess tal-applikazzjoni mill-Aġenzija Eżekuttiva Ewropea għall-Edukazzjoni u għall-Kultura.

Għal aktar informazzjoni tista’ tikkuntattja lill-Aġenzija Eżekuttiva Ewropea għall-Edukazzjoni u għall-Kultura jew lill-Kummissjoni Ewropea.