Próifíl an iarratasóra
- Institiúid ardoideachais atá lonnaithe in aon tír ar domhan. Na hinstitiúidí sin atá lonnaithe i dtíortha atá páirteach sa Chlár Erasmus+, caithfidh Cairt Ardoideachais Erasmus (ECHE) a bheith acu.
- Ní féidir le daoine aonair cur isteach air.
Fad tréimhse: 3 bliana
Uasmhéid an deontais: €100,000 (80% ar a mhéad de chostais iomlána an chláir nó an chúrsa teagaisc)
Cad é Ionad Barr Feabhais Jean Monnet agus cad a dhéanann sé?
Institiúid ardoideachais a mholann Ionaid Barr Feabhais Jean Monnet agus déanann an institiúid sin iad a óstáil. D’fhéadfadh comhar a bheith ann idir roinnt dámh/ranna chun an tIonad a chur ar bun, agus d’fhéadfadh eagraíochtaí ag a bhfuil saineolas i léann an Aontais Eorpaigh a bheith bainteach leo freisin.
Lárionaid inniúlachta agus eolais i dtaobh léann an Aontais Eorpaigh is ea Ionaid Barr Feabhais Jean Monnet. Bailítear le chéile sna hIonaid saineolas agus inniúlachtaí saineolaithe ardleibhéil agus é mar aidhm acu sineirgí a fhorbairt idir disciplíní agus acmhainní éagsúla i léann na hEorpa.
Tá ról lárnach acu i dtaca le teagmháil a dhéanamh le mic léinn ó dhámha nach mbíonn baint acu de ghnáth le saincheisteanna an Aontais Eorpaigh, chomh maith le lucht ceaptha beartas, an tsochaí shibhialta agus an pobal i gcoitinne. Tugann siad an deis do shaineolaithe freisin comhghníomhaíochtaí trasnáisiúnta a chruthú.
Cad lena bhfuiltear ag súil ó Ionad Barr Feabhais Jean Monnet?
Ba cheart do na hIonaid
- na hacmhainní atá ag a n-institiúid, agus a bhaineann le léann an Aontais Eorpaigh, a eagrú agus a chomhordú
- ceannasaíocht a léiriú ar ghníomhaíochtaí taighde maidir le hábhair ag a bhfuil baint sonrach leis an Aontas
- na torthaí is ábhartha a bhailiú, a fhoilsiú agus anailís a dhéanamh orthu
D’fhéadfaidís tacaíocht a thabhairt i dtaca le hábhar a fhorbairt do thopaicí a bhaineann leis an Aontas lena ndéanfar nuashonrú ar na curaclaim atá ann faoi láthair agus iad a chomhlánú, sin agus an plé agus an malartú taithí a choinneáil ar bun.
Ba cheart dóibh a bheith ina dtagairt acadúil i dtaca le hábhair a bhaineann leis an Aontas agus dul i dteagmháil le leibhéil eile oideachais agus leis an bpobal i gcoitinne.
D’fhéadfadh na rudaí seo a leanas a bheith mar chuid den obair for-rochtana sin:
- imeachtaí cumarsáide agus eolais ar leibhéal na hEorpa agus ar an leibhéal náisiúnta
- léachtaí, seimineáir, nó ceardlanna le lucht ceaptha beartas ar an leibhéal áitiúil, réigiúnach nó náisiúnta nó leis an tsochaí shibhialta
- páirt a ghlacadh i gcleachtadh foghlama sonrach ar an leibhéal scoile agus ar leibhéal an ghairmoideachais agus na gairmoiliúna
- líonrú le heagraíochtaí eile agus le daoine aonair a fhaigheann tacaíocht ó Ghníomhachtaí Jean Monnet
- a gcuid gníomhaíochtaí a fhoilsiú ina n-acmhainní oideachais oscailte